حوار مع نفسي اللوامة

حوار نفسى (مع نفسى اللوَّامة)

ألت أعُّد مع نفسى شوية

مش يمكن أفشة عليَّة

ماأنا عارفها النكدية

بأآلى كتير معملتهاش

من حبة مبَكَلمهاش

أنوى وأدِّيها طناش

ألت يا واد مابدّهاش

متزعّلهاش

واهى أعدة تفوت

ولا حد يموت

وأفلت الباب بالمفتاح

والتليفون علشان أرتاح

وبدأت معاها الحوار

دى طالع من عينها شرار!!

أنا: إزيك يا حبى عاملة إيه؟

هى: أول مافتكرت يا بيه!

أنا: مالك بس أفشة ليه؟

هى: سارح وسايبنى طول الوأت

(وبصّتلى من فوء لـتحت)

أنا: منتى عارفة الشغل وهمُّه

إرش ولازم نلمُّه

هى: يعنى الشغل أهم منّى؟

إنت هتجننّى؟

(ألت يا واد لمّ الدور)

أنا: يا ستّى حقك علية

دنتى عنيّة وأغلى من الدنيا دية

بس أوليلى طلباتك

وعرّفينى احتياجاتك

هى: محتاجة اهتمام

أنا: متوضحى الكلام

هى: مفتقدة السلام

أنا: مش فاهم .. خلاص بنام

هى: مش عايزة فلوس وغِنا

عاوزة نقرب من ربنا

أنا: أصدك نزّود فى العبادات؟

هى: طبعاً، بس معاها حبة حاجات

سلوكيات

تأليل سلبيات

ونكتر الإيجابيات

أنا: بس دة وجع دماغ

دنتى بجد عايشة فراغ

(كلمة خرجت غصب عنى

طاشت منى!!)

هى: شكلك مش فاهم كلامى

يلّلا أُوم من أُدَّامى

أنا: طب معلش إستحملينى

إهدى بس وفهّمينى

هى: لازم يكون لك دور

وإلا تموت طرطور

معلش خلّلينى على راحتى

وحاول تستحمل صراحتى

أنا: أُولِى يا مرايتى

مصلحتك مصلحتى

هى: لازم تعمل خير للناس

لازم تتعب تمسك فاس

وإوعى تسلِّم للوسواس

حاول تسعد أى تعيس

وإعلن حربك على إبليس

أنا: صعب .. دة أنا بشر وضعيف

هى: مالك كدة خرع وخفيف

أنا: منتى عارفة شطارته عل إنسان

هى: مالوش عليك سلطان

أنا: بس أنا حيران

هى: طب مترجع للقرآن

أنا: صعب عليَّة

هى: سيبك مل حجة ديَّة

أنا: طب بعدين .. بس يومين

هى: وتضمن عمرك منين؟

أنا: دة انا لسة شباب

هى: عمرك محدده الوهَّاب

أنا: بس أنا معرفش السكة

هى: إسال وبلاش ربكة

أنا: خايف أشد وأرجع أسيب

هى: إرجع لسنة الحبيب

أنا: خايف شكلى يبقى غريب

هى: دى حِجة وإدمت يا كئيب

أنا: حاسس بصداع فدماغى زنة

هى: ياابنى بتهرب من الجنة!

أنا: طب أُوليلى إيه العمل؟

هى: اصبر خلِّيك جمل

أنا: أنا تعبت مِلتفكير

هى: اسعى وعليه التدبير

أنا: مش إنت نفسى؟ ساعدينى

أبدأ منين؟ دِلِّينى

هى: اسمع منِّى



دوّر عليَّة أوى

متنسانيش وتسيبنى تانى

تعالى نتصالح بجد

ونساعد بعض بحب

تلاقى دورك فى الحياة

تنفع الناس والبلد

نبنى الأمة من تانى

يفتخر بيك الحبيب

ويدخّلك معاه الجنة

طريق طويل لكن جميل أخره الجنة

تعالى نحلم بالجنة

تعالى نحلم لكن بجد

بجد بجد